1. House Pass dil tur hian engtia hmalak tur nge?

House Pass dil tur chuan City/Town area chhung ami dil theih a ni a. Google atangin online in eram.mizoram.gov.in-ah dilna thehluh tur ani a, mahnia dilna thehlut thiamlo tan veng hrang hrang-a Common Service Centre mahni remchanna hmun pan mai tur ani.

2. House Pass dil turin eng documents te nge ngai?

1. A diltu voter ID (EPIC).
2. A diltu Adhaar.
3. Tribal Certificate
4. Passport size thlalak copy
5. Zoramchhiah pekna Receipt
6. Ration Card.
7. Non-tribal (Gorkha) tan section 2, sub-section 16 of Mizoram Land Revenue Act,2013-in a phut angin Mizoram mi an nih tichiang turin Gorkha census list anmahni hming lanna an thil tel tur a ni.

Heng documents pawimawhte hi original emaw a copy anih pawhin fiahfai tha tak a ni tur ani.

3. In hmun pakhat atan engtia zau nge pek theih anih?

The Mizoram Land Revenue Rules, 2013. Rule 12, sub-Rule (2) hmanga In hmun atan a bithliah chu chhungkaw khat tan 1337.80 Sqm (i.e. 1 bigha) a zau a pel tur a ni lova, a zim lamah chuan 111.5 Sqm (i.e. 1200 Sqft) aia zim lo tur a ni.

4. House Pass dilna thehluh fel hnuah engtia bawhzui tur nge?

House Pass dilna thehluh hnuah a tehtu tur Survey Firm hnenah pek thin a ni a, a diltu hnenah dilna thehluh laia phone No. dahah whatsapp hmangin hriattir thin a niin survey fee 50% an chawi tur zat te pawh hriattir thin an ni. Pawisa pek tura tuk hi online a pek tur a ni. A diltu /phone No.dah neitu-in whatsapp hi lo ngaihchan thin tur a ni. Inhmun diltute tan an file/dilna awmna hmun hi Whatsapp hmangin hriattir thin ani a, heihi mipuite tan office dawr buai ngai lova awlsam zawk a an dilna dinhmun an hriattheih nan a tih ani.

5. House Pass dilna hmun teh tura fee pek ngaite pek anih hnuah hmalak zel dan tur engtin nge?

House Pass tura ram dillai hmun hi a tehtu tura ruat Survey Firm atangin tehfel hnuah NOC leh documents dangte a kim chuan report siam a thehluh tur a ni a. Hemi hnu hian Office lamah an lo enfel (check) anih hnuah thil fello hmuh anih loh chuan Land Committee/Team of Officer te enfiah tura thawn ani ang. Land Committee /Team of Officers ten recommend tlaka an ngaih chuan Recommend-na nen an pe kir leh ang.

In hmun atana ram dillai chu ram ruak lei emaw, V/C Pass lei emaw, tunhma a Pass/Land Lease awmna a neitu-in Sorkar phalna-a relinguish a dil anga cancel tawh anih chuan Sorkar Notification Vide No.A.36011/7/ 2025-LR&S dt.9.9.2025 duh angin ‘Deed of Agreement’ siamin Sorkar-in a bithliah Stamp Duty leh Registration Fee te pein Property Registration Office-ah Register tur a ni a. Hemi hnu hian Sorkar phalna (approval) la turin kal tir leh tur a ni.

6. Sorkar-in House Pass pe turin phalna a pek hnuah engtia hmalak zel tur nge?

Sorkar atanga phalna a awm hnuah a ram (location) awmna District Revenue Office atangin House Pass issue tur a ni a, House Pass khulchhuahna tur fee pek ngaite pek fel anih hnuah House Pass pekchhuah ani ang.

7. Ka House Pass area hi midang tan thenchhuah ka duh a, engtin nge hma ka lak ang?

Google atangin online in eram.mizoram.gov.in-ah dilna thehluh tur ani a, mahnia dilna thehlut thiamlo tan veng hrang hrang-a Common Service Centre mahni remchanna hmun pan mai tur ani.

8. House Pass thendarh turin eng documents te nge ngai?

1. House Pass Original.
2. A neitu leh a thendarh nei chhawngtu tur Voter ID leh Adhaar.
3. Chhiah pekna update
4. A thendarh neitu tur non-tribal (Gorkha) anih chuan section 2, subsection 16 of the Mizoram Land Revenue ACT, 2013 in a phut angin Mizoram mi diktak an ni tih finfiahna turin an hming lanna Nepali Census List an thil tel tur ani.

Documents te hi original emaw a copy anih pawhin fiahfai tha tak ani tur ani. House Pass thendarh dil tur chu a valid tur a ni a, a lo thi tawh anih chuan renew dil hmasak tur a ni.

9. House Pass then dilna thehluh fel anih hnuah engtia ngaihven tur nge?

House Pass then dilna thehluh hnuah a tehtu tur Survey Firm hnenah pek thin a ni a, a diltu hnenah dilna thehluh laia phone No. dahah whatsapp hmangin hriattir thin a niin survey fee 50% an chawi tur zat te pawh hriattir thin an ni. Pawisa pek tura tuk hi online a pek tur a ni. A diltu /phone No.dah neitu-in whatsapp hi lo ngaihchan thin tur a ni. Inhmun then dilna ah hian diltute tan an file/an dilna awmna hmun hi Whatsapp hmangin hriattir thin ani a, heihi mipuite tan office dawr buai ngai lova awlsam zawk a an dilna dinhmun an hriattheih nan a tih ani.

10. House Pass then (partition) tur chu teh fel anih hnuah engtia hmalak zel tur nge?

House Pass chu then tura teh fel anih hnuah thil fello a awm lova, NOC te lak kim anih chuan a tehtu-in report a pe anga, a report chu Office lamah enfel (check) anih hnuah harsatna a awmlo anih chuan Directorate kaltlangin Sorkar phalna la turin thawn a ni ang.

11. House Pass then (partition) chu lachhuak turin fee chawi ngai a awm em?

House Pass lachhuak tur hian Sorkar-in rate a siam angin a fee chhut chawp tur a ni a, a area zauh dan a zir leh a ram hlut dan a zirin chawi tur hi a in an loh avangin chawi tur zat hi sawi lawk theih a ni lo.

12. House Pass te hi a thih hnuah engtia renew tur nge?

House Pass te hi Sorkar-in a pek hun chhung a ral a, a thih tawh chuan Google atangin eram.mizoram.gov.in-ah Form 2c hmangin online a submit tur a ni a. Mahni a thehlut thiamlo tan Common Service Centre-ah kal mai tur a ni.

13. House Pass renew dilna atan eng document te nge ngai?

1. House Pass renew tur
2. A neitu Voter ID
3. A neitu Adhaar
4. Chhiah pekna hnuhnung ber
5. A ram awmna Land Committee recommend-na (Land Committee recommend-na la tur hian a ram awmna Revenue District Office-ah a Form lakchhuah tur ani.)

14. House Pass renew tur hian chawi ngai a awm em?

Tuna Sorkar-in O/M hmanga rate a bithliah (Vide No.H.11018/4/2025-ESTT-(LR&S). Dt.25.3.2026 ) angin kum 10 atan Rs.500 chawi tur a ni a. House Pass hi a thihna a rei tawh anih chuan a rei dan a zirin penalty chawi tur chhut chhuah chawp tur a ni.